д. Вомынбож

Вомынбӧжса кодзув

Гижышта Николай Васильевич Сенькин (Öртем Вась Миколай) йылысь, кодлӧн олӧмыс — ставлы пример. Чужис 1921 вося март 12 лунӧ Кулӧмдін районса Вомынбӧж грездын. 1958 восянь 1962 воӧдз вӧлі СССР-лӧн Верховной Советса депутатӧн. 1954 восянь юрнуӧдіс «Дружба» колхозӧн. 1963 воын лоис «Пожегодскӧй» совхозын рабочкомса юралысьӧн.

Чужис шӧркодь крестьяналӧн семьяын. Батьыс Василий Артемьевич Сенькин (Öртем Вась), мамыс Анастасия Никитична Сенькина (Микита Наста). Дас челядь пӧвстын вӧлі нёльӧд кагаӧн. Пожӧгын помаліс 8 класс.

1937 вося арын босьтчис уджавны Помӧсдін сиктсӧветувса Громов нима колхозын. Асьсӧ петкӧдліс бура уджалысьӧн, уджӧ сьӧлӧм пуктысь мортӧн.

1938 воын пырис комсомолӧ. 1940 воын сійӧс пуктісны комсомоллӧн Кулӧмдінса райкомын юкӧнса начальникӧн. Николай радейтіс томсянь тӧдны кольӧм кад, страналысь олӧм, кывкутӧмӧн вӧчис общественнöй удж сиктын и районын. 1941 вося январын лоис МТС-ын политотделса начальниклӧн комсомол удж кузя медводдза отсасьысьӧн. Тайӧ жӧ вося июльын сійöс вуджӧдісны уджалысь депутатъяслӧн райсоветö кадръяс кузя юкӧнса начальникӧн.

1942 воын босьтчис юравны Громов нима колхозын. 1943 воын бӧрйисны Пожӧг сиктсӧветлӧн исполкомса юралысьӧн. Фронт вылӧ муніс сійӧ вося июньын, служитіс 4-ӧд Украинскöй фронт вылын 48-ӧд зенитнöй артиллерийскöй дивизионын.

1944 вося январын воліс фронт вылысь отпускӧ да гöтрасис Анна Савельевна Сенькина (Сава Анна) вылӧ, коді тайö кадö вежлаліс челядьлысь кӧлуй Вомынбӧжса детдомын.

1945 вося апрельын Николай Васильевич аслас батальонкӧд ӧтвылысь уськӧдіс немечьяслысь кык самолёт. Таысь пасйисны «За отвагу» медальöн. Медбӧръя кось вӧлі 1945 вося майын. Сэки жӧ и доймис.

Война вылысь локтӧм бӧрын Николай Васильевичöс пуктісны партиялӧн Кулӧмдін райкомса секретарлы отсасьысьӧн. Сійӧ ёна уджаліс сиктса олӧм бурмӧдӧм вӧсна, юрнуӧдіс сиктӧ сёян-юан, кӧлуй да мукӧдтор вайӧм кузя уджӧн. 1947-1949 воясын велӧдчис партийнöй школаын. 1940 воын сійӧс пуктісны партиялӧн Помӧсдін райкомса секретарӧн. 1954 воын лоис Вомынбӧжын Г.М. Маленков нима ыдждӧдӧм колхозса юралысьӧн. Сэсся сійӧ лоис «Дружба» колхозӧн. Сиктын олӧм вежсис зэв ёна: воис техника (комбайнъяс, тракторъяс, оборудование), ӧти бӧрся мӧд кыпалісны выль керкаяс, кык воӧн сикт дзоньнас выльмис. Колхоз пыр отсаліс аслас уджалысьяслы: сетіс турун, юкліс нянь, вичмӧдіс школаӧ ветлан паськӧм, велӧдчан книгаяс, челядьлы выльвося козинъяс. Сиктын воссисны начальнöй школа да детсад.

Ёна тӧждысисны колхозникъясӧс шойччӧдӧм вӧсна. Котыртлісны гажъяс, сьылан да йӧктан рытъяс. Школа бердын кутісны восьтны томъяслысь енби. Праздникъяс кежлӧ томулов лӧсьӧдлісны гажъяс, ворсана петкӧдчӧмъяс. Вӧлі асшӧр ворсысьяслӧн котыр. Олӧма йӧз ӧтувтчисны сьылан котырӧ. Сьылісны эз сӧмын праздникъяс дырйи, но и шойччан лунъясӧ. Сиктса Кырйыв пыр вӧлі гажӧдчанінӧн. Тулыссянь сёр арӧдз быд шойччан лунӧ сьылысьяслӧн котыр чукӧртліс йӧзӧс кыпыд гаж вылӧ Вомынбӧжысь да мукӧд сиктысь. Мича сьылан гор малыштліс сьӧлӧм.

1958 воын Николай Васильевичӧс бӧрйисны СССР-лӧн Верховнöй Сӧветса депутатӧн. Тайӧ вӧлі дзик выль туй, быттьӧ выльысь чужöм, войтырлысь оласног выль ногӧн аддзӧм. Сюрис позянлун тӧдмасьны эз сӧмын районын да республикаын, но и став странаын чукӧртӧм бурторъясӧн.

1963 воын Н.В. Сенькин муніс босьтны выль тӧдӧмлунъяс Кировса видз-му овмӧс институтын котыртӧм курсъяс вылӧ. Тайӧ жӧ воын «Дружба» колхозлӧн подув вылын котыртчис «Пожегодскӧй» совхоз, кӧні Николай Васильевич лоис рабочкомса юралысьӧн.

Радейтіс семьясӧ, быдтіс 8 челядьӧс (нёль пи: Василий, Александр, Леонид да Геннадий, нёль ныв: Нина, Лидия, Татьяна да Ольга). Ставныс велӧдчисны, витӧн помалісны институтъяс, куимӧн — техникумъяс.

Вомынбӧжын Вась Миколай пыр вӧлі выльтор пыртысьӧн. Сылӧн керкаын медводз кутіс юргыны радио, а сэсся лоис и телевизор. Сы дорӧ чукӧрмывліс ставнас сиктыс. Ставӧн ӧтлаын кывзісны передачаяс, а сэсся сёрнитісны на йылысь.

Николай Васильевич туйдіс, кыдзи ловзьӧдны важ мельнича, кодӧс жугӧдлісны 1920-ӧд воясын. Савватий Васильевич Сенькин босьтчис изны. Сідзжӧ сиктын воссисны нянь пӧжаланін да лавка.

А война кадӧ Вомынбӧжын вӧлі детдом, кӧні видзисны челядьӧс фашистъясӧн босьтӧминъясысь, унаӧн вӧліны Ленинградысь. Война помасьӧм бӧрын детдомын уджалысьяс отсалісны и сиктса сьӧкыда олысь семьяяслы — вердлісны челядьӧс.

Вась Миколай радейтіс вӧравны да кыйны чери. Тшӧкыда сёрнитіс томуловкӧд кольӧм кад да ӧнія олӧм йылысь, радейтіс шмонитны. Войналӧн медводдза лунъяссянь гижаліс быд лун, мый вӧчсьӧ мирын, странаын, республикаын, асланыс сиктын. Медся кыпыд лунӧн сылы вӧлі май 9-ӧд лун. Быд во тайӧ лунӧ казьтыліс сійö кадсӧ, кор вӧлі фронт вылын, ассьыс ёртьяссӧ, командирьяссӧ, шудсӧ и шогсӧ.

Муніс олӧмысь 1993 вося май 8-ӧд лунӧ Вомынбӧжын. Сиктсаяс казьтылӧны сійӧс шоныда.

Великöй Отечественнöй война вылын айму дорйӧмысь Николай Васильевичӧс пасйисны «За отвагу», «За оборону Ленинграда», «За освобождение Кёнигсберга», «За освобождение Праги», «За победу над Германией в Великой Отечественной войне 1941-1945 гг.» медальясӧн, а бур уджсӧ — Трудöвöй Гöрд Знамя да Знак Почёта орденъясӧн.

Яна ВАСИЛЬЧЕНКОВА.

Снимок вылын: Н.В. Сенькин война вылысь локтӧм бӧрын.

Парма гор, 2015, Июнь 9 лун.

 © Усть-Куломская межпоселенческая библиотека